1.3. It-tmexxija tal-iskejjel
Il-mexxejja tal-iskejjel li huma effettivi jippromwovu kulturi ta’ kollaborazzjoni. L-iskejjel jeħtieġu mexxejja kompetenti u motivati ħafna, iddedikati u mmexxija mill-valuri, li jistgħu jinkoraġġixxu l-prattika riflessiva u li jippromwovu d-djalogu u l-koperazzjoni fost l-atturi kollha tal-iskola u ma’ partijiet konċernati oħra. Lill-għalliema jiżgurawlhom ambjent li jappoġġahom, biex jitħeġġeġ it-tagħlim minn għalliem għall-ieħor, il-ħin għar-rispons u r-riflessjoni, u n-netwerking fl-iskejjel u bejniethom. Dawn jaqdu rwol essenzjali wkoll biex jingħataw opportunitajiet għall-edukazzjoni inizjali tal-għalliema orjentata lejn il-prattika u għal żvilupp professjonali kontinwu bbażat fuq ir-riċerka.
Il-mexxejja tal-iskejjel għandhom ikunu kapaċi jaqsmu l-awtorità billi jqassmu r-rwoli tat-tmexxija fi ħdan l-iskola. F’mudell ta’ “tmexxija mqassma”, it-tmexxija, il-persunal akkademiku u mhux akkademiku, l-istudenti, kif ukoll il-ġenituri u l-familji jitħeġġu biex jieħdu rwoli ewlenin f’xi qasam partikolari ta’ għarfien espert, biex jerfgħu r-responsabbiltà u biex jieħdu l-inizjattiva b’mod individwali jew bħala grupp. Jeħtieġ jinħolqu opportunitajiet għal relazzjonijiet tax-xogħol aktar flessibbli. Għalhekk jaf ikun hemm bżonn jinbnew strutturi istituzzjonali: jinħolqu proċeduri u arranġamenti ġodda tax-xogħol (bħal kumitati, timijiet, gruppi ta’ ħidma formali u informali, eċċ.); jiġi organizzat il-ħin u jinstabu r-riżorsi biex tkun tista’ ssir ħidma kollaborattiva u jiġu ttestjati ideat innovattivi, eċċ.
L-inizjattivi ta’ suċċess fl-Istati Membri jkollhom strutturi ta’ tmexxija kollaborattiva. Fost l-oħrajn, din tista’ ssir billi xi membri tal-persunal jingħataw rwoli bħala maniġers intermedji jew koordinaturi u billi titħalla ċerta flessibbiltà ħalli jinħolqu timijiet tat-tagħlim. L-inizjattivi tal-imgħoddi juru wkoll l-importanza li jintgħażel sew il-persunal tal-appoġġ (l-esperti, il-mentors, il-kowċis) li jistgħu jiggwidaw il-proċess tal-bidla u jgħinu lill-kapijiet tal-iskejjel u lill-għalliema skont il-bżonn.
Biex titrawwem kultura ġdida fi skola hemm xi sfidi li għandhom jitqiesu b’rabta mal-ġestjoni tar-riżorsi umani. Pereżempju din tista’ tinkludi l-proċess biex il-persunal tal-iskola jsir konvint mill-benefiċċji tal-kollaborazzjoni, biex jinħolqu timijiet imħallta ta’ persunal akkademiku u mhux akkademiku, u biex tkun żgurata s-sostenibbiltà tal-ħidma kollaborattiva.
Aktar informazzjoni:
Il-Kummissjoni Ewropea, Strengthening teaching in Europe: New evidence from teachers compiled by Eurydice and CRELL, June 2015, l-Uffiċċju tal-Pubblikazzjonijiet tal-Unjoni Ewropea, il-Lussemburgu, 2015.
In-Netwerk ta’ Politika Ewropew dwar it-Tmexxija fl-Iskejjel (EPNoSL): pjattaforma online bi studji tal-każijiet dwar prattiċi tajba fil-qasam tat-tmexxija tal-iskejjel fl-Ewropa
“Chapter 3: School Leadership” f’The OECD Teaching and Learning International Survey (TALIS) – 2013 Results, l-OECD, Pariġi, 2014, pp. 55-83.
Uri aktar
