L-iskejjel li jixtiequ jevitaw u/jew inaqqsu t-tluq bikri mill-iskola u jippromwovu s-suċċess edukattiv għall-istudenti kollha jridu jiżviluppaw viżjoni strateġika għal edukazzjoni inklużiva u madwar l-istudenti. Il-missjoni ewlenija tal-iskola hija li tassigura li l-istudenti kollha jkunu jistgħu jibbenefikaw minn edukazzjoni ta’ kwalità u jilħqu l-potenzjal sħiħ tagħhom ta’ tkabbir, ikunu xi jkunu l-qagħda soċjoekonomika tagħhom u ċ-ċirkustanzi individwali jew relatati mal-familja. L-istudenti huma individwi “sħaħ”. L-enfasi hija fuq it-tagħlim akkademiku kif ukoll fuq l-iżvilupp u l-benesseri personali. L-iskejjel jiżviluppaw kultura u klima li jisħqu fuq l-għoti ta’ appoġġ xieraq ħalli kull student ikun jista’ jilħaq il-miri edukattivi. Il-ħsieb ta’ dan l-approċċ hu li jixħet “l-iskola kollha madwar student wieħed sħiħ”.
Viżjoni strateġika ċċentrata fuq l-istudent tisħaq li għandhom jinħolqu ambjenti tat-tagħlim sikuri, akkoljenti u li jieħdu ħsieb lill-istudent, biex dan iħossu involut u jkun jista’ jikber u jsir individwu u membri tal-komunità, iħossu rispettat u apprezzat, u t-talenti u l-ħtiġijiet speċifiċi tiegħu jiġu rikonoxxuti. Fost l-elementi importanti hemm li:
- jitfasslu aspettattivi għoljin għall-istudenti kollha;
- jitħeġġu prattiċi u attitudnijiet fl-iskola u fil-klassijiet li jippromwovu l-motivazzjoni u l-impenn tat-tfal u ż-żgħażagħ favur it-tiswir ta’ klima favorevoli u ta’ rispett (fejn pereżempju, il-vjolenza u l-bullying jiġu indirizzati b’mod sistematiku);
- jissawru relazzjonijiet pożittivi bejn l-għalliema u l-istudenti msejsin fuq il-fiduċja; u
- jitħeġġeġ l-użu ta’ metodi tat-tagħlim u kurrikuli li jkunu perċepiti bħala stimulanti u rilevanti.
Meta tkun qed tiżviluppa jew tirrevedi l-viżjoni, il-prinċipji u l-valuri gwida tal-iskola tiegħek, hu importanti li tistieden lill-partijiet konċernati kollha, fosthom lill-persunal, lill-istudenti, lill-ġenituri u lill-familji, biex jieħdu sehem b’mod attiv. Din il-parteċipazzjoni wiesgħa tassigura komunikazzjoni, koperazzjoni u ħakma aħjar tal-viżjoni fost il-membri tal-komunità skolastika. B’mod partikolari, l-involviment tal-istudenti jista’ jżid il-motivazzjoni u l-impenn tagħhom fil-proċess edukattiv u jsaħħaħ is-sens ta’ appartenenza fil-komunità skolastika.
St. Kilian’s Community School: Eżempju ta’ żvilupp kollaborattiv fil-viżjoni
Bħala parti mir-riflessjoni u l-ippjanar għat-titjib fl-iskola, St Kilian’s Community School fl-Irlanda involviet lill-istudenti u lill-ġenituri fil-proċess biex tirrevedi dak li temmen u l-prinċipji li jiggwidawha. L-istudenti indikaw li kien importanti għalihom li ħinhom fl-iskola jservihom ta’ ġid fejn jidħlu l-ħiliet u l-għarfien li huma rilevanti għall-karrieri futuri tagħhom.
Biex tkun żgurata l-aqwa edukazzjoni possibbli għall-istudenti tagħna, St Kilian’s Community School jidhrilha li kulħadd għandu:
Drittijiet bir-responsabbiltajiet;
Jiġi ttrattat b’mod ġust u ugwali;
Jitwieżen biex ikun l-aħjar li jista’ jkun;
Jikseb valur għall-ħin li juża;
Jiġi rispettat;
Iħossu milqugħ u jieħu pjaċir; u
Ikun jista’ jaċċessa faċilitajiet ta’ kwalità kbira.
Sir af aktar:
“Chapter 4: School and Community” f’Child Friendly Schools Manual, Unicef, Ġinevra, 2009, pp. 97-120.
What is School-based Management?, World Bank, Washington DC, 2008.
Qari addizzjonali:
Il-pjattaforma online tal-UNICEF, Rights Respecting Schools Award
