5.1. Timijiet multidixxiplinari
Approċċ multidixxiplinari għall-iżvantaġġ edukattiv u t-tluq bikri mill-iskola (ESL) ilaqqa’ flimkien professjonisti minn ġewwa l-iskola u ’l barra minnha, fosthom psikologi, assistenti soċjali u professjonisti fil-kura medika. It-timijiet multidixxiplinari għandhom il-potenzjal li joffru firxa ta’ servizzi sabiex jappoġġaw żgħażagħ f’riskju ta’ żvantaġġ edukattiv u tluq bikri mill-iskola. Dan jinkludi, pereżempju, konċentrazzjoni fuq l-iżvilupp lingwistiku tat-tfal, appoġġ għas-saħħa mentali, appoġġ emozzjonali, ħiliet għall-prevenzjoni tal-bullying, konċentrazzjoni fuq kif se jintlaħqu l-familji emarġinati u appoġġ fl-iżvilupp tal-ħiliet fit-trobbija tat-tfal.
Sabiex jinħolqu u jiġu sostnuti timijiet multidixxiplinari huwa meħtieġ approċċ strateġiku. Huwa essenzjali li t-tim multidixxiplinari jiżviluppa approċċ koerenti sabiex jindirizza l-ħtiġijiet kumplessi tal-istudent. Pjuttost milli kull membru tat-tim jaħdem separatament biex jiġu indirizzati l-prijoritajiet proprji tiegħu, dan jitlob li kollha jkollhom fehim kondiviż tar-riżultati li jridu jiksbu għal kull student, u jistabbilixxu kif jistgħu jiġbru flimkien il-kompetenza esperta kombinata tagħhom.
Ir-riċerka tissottolinja kundizzjonijiet ewlenin għall-funzjonament intern effettiv ta’ timijiet multidixxiplinari. Dawn il-kundizzjonijiet jinkludu, pereżempju, strateġiji xierqa ta’ tmexxija, ħiliet ta’ komunikazzjoni inklużiva, u ħiliet fis-soluzzjoni tat-tilwim. L-iżvilupp ta’ strateġiji kondiviżi u ħin u spazju suffiċjenti sabiex dawn jiġu implimentati huma wkoll importanti ħafna. F’ħidma bħala parti minn tim magħmul minn diversi aġenziji, il-professjonisti jista’ jkollhom bżonn ukoll jaqsmu r-riżorsi u l-informazzjoni tagħhom dwar l-istudenti li jkunu qegħdin jaħdmu magħhom sabiex dawn ikunu jistgħu jibbenefikaw minn appoġġ “kombinat”. Dan jista’ jkun jeħtieġ li t-timijiet joħolqu ftehimiet ġodda għall-qsim tal-informazzjoni u baġits kondiviżi għal xi interventi. Ir-riċerka tissuġġerixxi li intervent immirat għall-istudenti f’riskju ta’ tluq bikri mill-iskola jkun aktar effettiv jekk jitwettaq minn timijiet multidixxiplinari fl-iskejjel u/jew billi jinġiebu professjonisti esterni fl-iskejjel, u bl-involviment ta’ dawk kollha li jinteraġixxu mal-istudenti, sew jekk ikunu membri tal-familja, aħwa jew voluntiera, eċċ.
It-timijiet multidixxiplinari se jkunu meħtieġa jieħdu sehem f’interventi f’livelli differenti u mal-individwu, il-grupp, il-klassi, l-iskola, il-familja u l-komunità. Hija meħtieġa konsiderazzjoni bir-reqqa tal-kompiżizzjoni u l-etos tat-tim, b’affinità kulturali mal-familji emarġinati. Jiddependi mis-sitwazzjoni, jista’ jkun meħtieġ li jiġi stabbilit tim multidixxiplinari kompletament ġdid, jew jista’ jkun xieraq li jinbnew timijiet fi ħdan strutturi, organizzazzjonijiet u postijiet eżistenti fil-komunità, skont il-kuntest tal-pajjiż u taż-żona lokali.
Aktar informazzjoni:
Downes, P., Multi/Interdisciplinary Teams for Early School Leaving Prevention: Developing a European Strategy Informed by International Evidence and Research, NESET Research Paper, 2011.
Uri aktar
