Ir-riċerka turi li l-benefiċċji tal-involviment tal-ġenituri jiddependu l-aktar fuq il-kwalità ta' dan l-involviment. L-iskejjel għandhom rwol importanti x’jaqdu biex jiżviluppaw u jżommu l-flussi tal-komunikazzjoni u tal-informazzjoni mal-ġenituri. Il-biċċa l-kbira tal-pajjiżi Ewropej għandhom fis-seħħ dispożizzjonijiet legali li jiżguraw id-dritt tal-ġenituri li jkunu infurmati dwar l-edukazzjoni ta’ wliedhom. Madankollu, dan jista’ ma jkunx effettiv ħafna għall-ġenituri u l-familji li jkunu l-aktar distanti mill-kultura tal-iskola. Minbarra l-arranġamenti formali għall-komunikazzjoni, huma meħtieġa sett ta’ miżuri kumplimentari li jilħqu gruppi differenti ta’ ġenituri, inklużi dawk bi stili differenti ta’ kif irabbu t-tfal u b’livelli differenti ta’ distakk mill-iskola.
Il-komunikazzjoni trid tkun reċiproka, bilanċjata u kontinwa. Minn naħa hu importanti li jiġi assigurat li l-ġenituri u l-familji jifhmu x’inhu mistenni minnhom u kif jikkontribwixxu għat-tagħlim ta’ wliedhom. Huma għandhom ikunu konvinti li l-istabbiliment ta’ djalogu bejnhom u l-iskola huwa essenzjali biex jiżdied is-suċċess edukattiv ta’ wliedhom. L-iskejjel iridu jisimgħu wkoll il-veduti tal-ġenituri kollha, inklużi tal-ġenituri li jkunu anqas involuti fl-edukazzjoni ta’ wliedhom.
Il-komunikazzjoni u l-informazzjoni jridu jkunu ċari, u jqisu l-isfondi kulturali u ekonomiċi differenti ta’ kull familja. Il-kanali tal-komunikazzjoni jridu jkunu diversifikati u jaqdu l-ħtiġijiet ta’ gruppi eteroġeni ta’ ġenituri: għandhom jippermettu skambju reċiproku tal-informazzjoni u qsim tal-esperjenzi. Dan jista’ jinkludi approċċ aktar formali, bħall-istedina lill-ġenituri biex jiltaqgħu mal-għalliema, jew inizjattivi iżjed informali, bħal sessjonijiet ta’ merħba fil-bidu tas-sena skolastika (li matulhom il-mexxejja tal-iskola u l-għalliema jilqgħu b’mod informali lill-ġenituri u lit-tfal u jispjegawlhom ir-regoli tal-iskola). Il-jiem għall-pubbliku u l-attivitajiet fakultattivi jew festivi jistgħu jgħinu wkoll biex isaħħu l-komunikazzjoni u l-fehim reċiproku. Il-ġenituri jistgħu jibbenefikaw ukoll minn sessjonijiet li jkunu ġew organizzati biex jgħinu ħalli jiġu spjegati l-kurrikulu, il-valuri u l-missjoni tal-iskola u l-gwida għall-karrieri.
L-għodod tal-ICT jistgħu jappoġġaw il-komunikazzjoni mal-ġenituri (eż. l-użu ta’ djarji elettroniċi, messaġġi miktuba, bullettini, siti elettroniċi interattivi, eċċ.), diment li jintuża lingwaġġ ċar u jkunu akkumpanjati minn miżuri oħra u minn taħriġ dwar kif għandhom jintużaw għal skopijiet tal-iskola. L-istedina lill-ġenituri biex josservaw il-klassijiet għal ħin limitat jista’ jkun ukoll ta’ benefiċċju għall-ġenituri (li jaf iserrħilhom rashom meta jaraw xi jsir fil-klassi u jitnebbħu dwar kif jistgħu jappoġġaw it-tfal tagħhom id-dar); l-għalliema (li jistgħu jużaw dawn l-opportunitajiet biex jistabbilixxu djalogu mal-ġenituri); u l-istudenti (li ħafna drabi jkunu aktar attivi fil-klassi meta jkun hemm il-ġenituri preżenti).
Jaf ikun hemm bżonn sforzi mmirati biex jintlaħqu l-ġenituri u l-familji aktar distanti, eż. permezz ta’ stediniet personalizzati, irrispettivament minn jekk it-tifel/tifla jkunux sejrin tajjeb jew le fl-iskola. Pereżempju, l-attivitajiet ta’ lħuq, il-medjaturi kulturali, il-mentors u l-appoġġ minn NGOs lokali jistgħu jgħinu biex teħfief il-komunikazzjoni mal-ġenituri migranti jew emarġinati. Il-ġenituri sikwit jistgħu jservu bħala riżorsa prezzjuża u jistgħu jappoġġaw lil xulxin.
Biex jibnu komunikazzjoni effettiva u pożittiva mal-ġenituri u l-familji, hu essenzjali li l-mexxejja tal-iskejjel u l-għalliema jiżviluppaw ħiliet fir-relazzjonijiet u l-komunikazzjoni. Il-kurrikulu tat-taħriġ tal-għalliema għandu jqajjem kuxjenza wkoll dwar l-importanza tal-involviment tal-ġenituri u l-ħtieġa li jinkiseb għarfien espert dwar ir-relazzjonijiet u l-komunikazzjoni.
L-informazzjoni minn stħarriġiet u dejta dwar il-klima fl-iskola u r-relazzjonijiet bejn l-istudenti, l-iskola, il-ġenituri u l-għalliema għandha tintuża biex jittejbu l-prattiċi u tiżdied il-kwalità fl-iskejjel.
Aktar informazzjoni:
Borgovoni, F. , Montt, G., Parental Involvement in Selected PISA Countries and Economies, Dokument ta’ Ħidma tal-OECD Nru 73, l-OECD, Pariġi, 2012,
L-OECD, Equity and Quality in Education: Supporting Disadvantaged Students and Schools, l-OECD, Pariġi, 2012,
