3.10. Appoġġ immirat: il-ħtiġijiet edukattivi speċjali u d-diffikultajiet fit-tagħlim
Ir-riċerka u l-politika tal-UE jqisu l-inklużjoni bħala fundamentali għall-kwalità u għall-ekwità fl-edukazzjoni. L-Artikolu 24 tal-Konvenzjoni tan-Nazzjonijiet Uniti dwar id-Drittijiet tal-Persuni b’Diżabbiltà jiddikjara li l-edukazzjoni inklużiva toffri l-aħjar opportunitajiet għall-istudenti b’diżabbiltà. Il-pajjiżi jridu jappoġġaw id-drittijiet marbuta mad-diżabbiltà billi jaqilbu minn mudelli mediċi li jiddefinixxu d-diżabbiltajiet bħala indebolimenti, għal mudelli soċjali li jenfasizzaw l-importanza li jinfetħu l-bibien għall-inklużjoni.
L-Aġenzija Ewropea għall-Ħtiġijiet Speċjali u l-Edukazzjoni Inklużiva tiddefinixxi l-edukazzjoni inklużiva bħala approċċ sistemiku biex tingħata edukazzjoni ta’ kwalità kbira fl-iskejjel mainstream biex ikunu ssodisfati b’mod effettiv il-ħtiġijiet akkademiċi u tat-tagħlim soċjali tal-istudenti kollha fil-komunità lokali tal-iskola. Għaldaqstant l-inklużjoni għandha aktar tiffoka fuq il-bini tal-kapaċità tal-iskejjel mainstream biex ikunu jistgħu jappoġġaw il-ħtiġijiet ta’ studenti mħallta milli jqassmu riżorsi addizzjonali lil gruppi magħżula (u tikkettati) f’ambjenti separati.
L-appoġġ effettiv lill-istudenti b’diżabbiltajiet u b’diffikultajiet fit-tagħlim jiddependi fuq approċċ skolastiku sħiħ, li jinkludi fokus ċar fuq it-tagħlim għal kulħadd; ir-rikonoxximent ta’ tipi differenti ta’ kisbiet (mhux biss is-suċċess akkademiku); it-tmexxija effettiva u mqassma tal-iskejjel; il-kollaborazzjoni tal-iskejjel mal-komunità lokali; u l-parteċipazzjoni tal-istudenti u tal-familji tagħhom fid-deċiżjonijiet dwar it-tagħlim tagħhom stess.
Fost l-approċċi tat-tagħlim li rnexxew fost l-istudenti b’diżabbiltajiet u diffikultajiet fit-tagħlim hemm:
- ħin addizzjonali għat-tagħlim u għall-appoġġ tat-tagħlim - taħriġ fi gruppi żgħar/individwali u tagħlim bħala tim jew tagħlim koperattiv (l-għalliem tas-suġġett regolari jidħol fil-klassi ma’ għalliem li jkollu għarfien espert fl-edukazzjoni għall-persuni bi bżonnijiet speċjali): l-estensjoni tal-ġurnata tal-iskola jew tas-semestri tal-iskola, u gruppi interattivi biex itejbu l-appoġġ fil-klassi għall-istudenti.
- l-użu ta’ gruppi flessibbli u eteroġeni ta’ studenti, flessibbiltà fl-ammont tal-ħin imqatta’ fil-klassi regolari; flessibbiltà fl-organizzazzjoni tal-ambjent tal-klassi; u l-promozzjoni ta’ aktar interazzjonijiet bejn tipi differenti ta’ studenti u tad-diversifikazzjoni tagħhom.
- it-tagħlim strutturat jintuża wkoll biex jittejjeb l-użu tal-ħin u jkun żgurat li l-istudenti kollha jifhmu xi jkun mistenni minnhom (dan hu effettiv aktar meta jintuża ma’ studenti b’disturb tal-ispettru awtistiku).
- appoġġ addizzjonali, pereżempju b’taħriġ f’ħiliet effettivi għall-istudju, jew il-ħolqien ta’ opportunitajiet għal tagħlim iżjed attiv (eż. soluzzjoni kollaborattiva tal-problemi). B’mod partikolari nstab li t-tagħlim koperattiv u l-appoġġ mill-pari huma ta’ benefiċċju għall-istudenti kollha. L-ICT għandu jintuża fil-klassi biex iżid l-involviment tal-istudenti.
- il-prevenzjoni ta’ kull tip ta’ vjolenza u/jew diskriminazzjoni lil studenti b’diżabbiltajiet, b’mudell ibbażat fil-komunità għall-prevenzjoni tal-kunflitti fl-iskola. Il-faċilitajiet tal-prevenzjoni, is-servizzi ta’ dijanjosi u l-parir psikoloġiku għandhom ikunu aċċessibbli għall-istudenti kollha fl-istess ċentru edukattiv, meta jkun possibbli.
Sir af aktar:
Ainscow, M., Special Needs in the Classroom: A Teacher Education Guide, il-UNESCO Publishing, Pariġi, 2004.
L-Aġenzija Ewropea għall-Iżvilupp fl-Edukazzjoni dwar il-Ħtiġijiet Speċjali, Organisation of Provision to Support Inclusive Education: Literature Review, l-Aġenzija Ewropea għall-Iżvilupp fl-Edukazzjoni dwar il-Ħtiġijiet Speċjali, Brussell, 2013
L-Aġenzija Ewropea għall-Ħtiġijiet Speċjali u l-Edukazzjoni Inklużiva u l-proġetti tagħha
Flecha, R., Successful Educational Action for Inclusion and Social Cohesion in Europe, Springer, Dordrecht-Heidelberg-Londra New York , 2015.
Molina, S. u Rios, O., ’Including students with disabilities in Learning Communities’, Psychology, Society, & Education, Vol. 2, Nru 1) 2010, pp. 1-11.
Uri aktar
