5. L-involviment tal-partijiet interessati
In-natura kumplessa tat-tluq bikri mill-iskola (ESL) titlob rispons multidimensjonali. Xi wħud mill-kawżi tiegħu huma marbuta ma’ fatturi ’l barra mis-sistema edukattiva, bħad-diffikultajiet personali, ta’ saħħa jew emozzjonali, il-problemi fil-familja jew ċirkustanzi soċjoekonomiċi fraġli. Il-persunal tal-iskola ma għandux (u ma jistax ikollu) l-kapaċità biex jindirizza dawn l-isfidi kollha. Għalhekk huwa essenzjali li jaħdem ma’ firxa usa’ ta’ partijiet interessati bl-għarfien espert xieraq.
Dan jitlob li l-iskejjel jiżviluppaw kollaborazzjoni transsettorjali soda ma’ firxa wiesgħa ta’ partijiet interessati esterni, b’kull parti interessata taqdi rwol biex tappoġġa l-vjaġġ edukattiv tal-istudenti u ssostni l-esperjenza tat-tagħlim tagħhom. Partijiet interessati differenti jistgħu jġibu perspettivi differenti u kumplimentari fil-fehim tal-ostakli għat-tagħlim u jistgħu joffru soluzzjonijiet li jkunu mfassla għall-ħtiġijiet speċifiċi ta’ kull student. Dawn jistgħu jgħinu wkoll biex jiġu indirizzati ostakli għat-tagħlim lil hinn minn dawk fl-ambjent immedjat tal-iskola, pereżempju billi jtejbu l-kundizzjonijiet tal-akkomodazzjoni, joffru appoġġ lill-ġenituri biex jaċċessaw l-impjiegi, itejbu l-aċċess għall-kura tas-saħħa u servizzi oħra, u jagħmlu disponibbli firxa wiesgħa ta’ attivitajiet estrakurrikulari. Il-ħtiġijiet diversifikati tal-istudenti jridu jkunu ċ-ċentru ta’ kull forma ta’ kollaborazzjoni, u jeħtieġ jitħaddem approċċ ħolistiku.
Il-koperazzjoni ma’ professjonisti u servizzi f’oqsma differenti (bħall-assistenti soċjali, il-persuni li jaħdmu maż-żgħażagħ, il-medjaturi interkulturali, l-infermiera, il-psikologi u terapisti oħra, l-NGOs u organizzazzjonijiet oħra bbażati fil-komunità mis-setturi tal-isport, l-ambjent kulturali u ċ-ċittadinanza attiva, il-pulizija, l-awtoritajiet lokali, u oħrajn) jistgħu jkunu ta’ benefiċċju kbir biex jiġu indirizzati l-problemi tal-istudenti. Il-koperazzjoni mas-sħab soċjali u n-negozji lokali hija wkoll importanti ħafna għax tista’ tgħin biex tiżdied ir-rilevanza tal-kurrikulu fejn tidħol id-dinja tax-xogħol, u tagħmlu aktar attraenti għaż-żgħażagħ.
Il-koperazzjoni tista’ tinkludi forom differenti ta’ ħidma fi gruppi, netwerking, u ħidma bejn l-aġenziji u tista’ tkun ibbażata fuq struttura formalizzata jew fuq arranġamenti aktar flessibbli. Fi kwalunkwe każ, il-kollaborazzjoni fuq livell lokali u ta’ skola tkun aktar faċli jekk tkun sostnuta minn politiki rilevanti u appoġġata b’arranġamenti ċari għall-koordinazzjoni (korp tal-koordinazzjoni jista’ jkun waħda mill-possibbiltajiet).
L-istabbiliment tal-koperazzjoni fost il-partijiet interessati jieħu ż-żmien u jirrikjedi li kulħadd jipparteċipa bħala sħab indaqs u jkun lest li jaħdem u jikkopera. L-iżvilupp tal-fiduċja, ir-rispett reċiproku u l-fehim jitolbu trawwim, iż-żmien u tmexxija b’saħħitha. Hu importanti li wieħed jaċċetta li jistgħu jinqalgħu tensjonijiet u problemi, u li jiġi stabbilit ambjent b’moħħ miftuħ fejn il-problemi jistgħu jiġu indirizzati u fejn professjonisti minn sfondi differenti jistgħu jitgħallmu mingħand xulxin u b’mod li jsaħħu l-għarfien u l-prattika professjonali tagħhom.
Uri aktar
